AUSTRALIA RAM  LAICA CAWNNAK

Australia Ram Laica Cawnnak

By F. Lai Len

Australia ram Laica cawnnak kan timi cu, Laimi nih mah le Khrihfabu asiloah mibu (community) nih ser in cawnmi Laica cawnnak pawl kha si lo in, Australia ram Victoria State acozah (Victorian Government) nih tuanvo vialte lak dih in, Laica (Chin-Hakha ca le holh) cawnnak kha, chim duhmi a si.Laimi nih mah kutke, mah thazaang chuah hau lo le, acozah nih zeizong vialte thilrit i khinh dih hnu ah, mipem Laimi pawl kha anmah le an holh te kha an philh thlau sual lai ti phanpiaknak le, an nunphung le an zulhphung tete  zong kha, cu an ca le an holh lila in kilveng kho hna sehlaw, Australia ram nih a zulhmi nunphung phunzakip chungah i paih ve hna seh, timi saduhthahnak he serpiak mi cacawnnak tu a si. Laimi nih kan chuahsemnak Lairam le Kawlram ah zeitik hmanhah kan rak hmuh bal lomi, kan rak tep bal lomi a theipar tha taktak a si.

Cacawn maw? Holh cawn dah?

Laimi nih cun “cacawn” kan hei ti phot ko, nain Mirang nih cun “holh cawn” an ti. Language School tiah sianginn min zong an auh. Hi holh cawnnak ahhin, vawleicung holh cawnnak nih a kalpi ningin cawn awk phun 4 (4 skills) in cawn a si. Cu hna cu: Speaking timi mah nih kaa in holh, Listening timi mah nih hna in ngaih, Reading timi mah nih rel, Writing timi mah nih ca in tial timi hna hi Laiholh cawnnak a hrampi le a tungtlang an si. Cuti ning cun, kan Laimi kan fale lila cu cawnpiak le chimh a si. Hi cawnnak phun 4 hi ahopoh nih mi phundang holh, bianabia ah, Tuluk holh, India-Kala holh, zeidang holh va cawn zongah, hman lengmang mi le thiamnak lei (skills) tahnak a hram bunh a tungtlang an si.

Holh cawn tik ahhin, a cawngtu nih mah innchung khorkhar ah hmanmi le holhmi, holh faparik (sub-dialect) an um ko lai. Cu an innchung khorkhar ah holhmi sub-dialect (bianabia ah: sub-dialect cu Zophei holh, Lautu holh, Zotung holh, Senthang holh tibantuk)  cu mah nih cawnmi holh cawnnak sianginn (inn maw, sianginn a khaan maw) chungah holh phung a si lo, a cawnmi holh (language) tu kha holh phung, chim phung a si.Cuti tuah lawnglawng ah, a cawnmi kha a thiam a fawi deuh lai, ti a si.

Cu Laica cawnnak cu a tanglei ahhin a dotdot in ka hun langhter lai.

Cacawnnak hriam le nam

Pui a tlingmi cacawnnak pakhat ah a herh–hai mi cu:  cawn a herh ko tiah lung a thomi minung/mibu an um a hau, a cawngtu hrimhrim zaa lak in an um a hau, cawn hngami ca, cauk (curriculum) ser le ngeih a hau, cawnnak inn / innkhaan ngeih/hmuh khawh a hau, ca a chimtu ngeih a hau, cu cacawnnak caah phung chung lut lakin ser a hau, a si khawh ahcun ca chimtu hna kha hlawh pek a hau, cu cawnmi ca cu peh thluahmah in kumfatin cawn khawh a hau, cu bantuk aa peh tein cawn khawhnak caah nule pale, mibu hna nih thazaang pek zungzal a hau fawn. Cu lengah cu cawnmi

​

ca a chimtu hna nih a tlingtlakmi ca chimhnak lei thiamnak (accredited qualifications) ngeih a hau, cachimtu hna zong chan le caan he aa tlakmi training/refresher course/ professional development ngeih le tuah lengmang a hau, ca chimh ningcang zong a tlingtlakmi cawnpiak ningcang in chimh a hau i camipuai (assessment/exams) zong a tlingtlakmi dirhmun/dot in tuahto a hau, ca chimh pah bu ah siangngakchia hna zong kha zoh aa dawhmi nuncan le ziaza (behavior) chimhchih a hau thiamthiam, Kawlram le Lairam in an rak i ken mi cafir le, midang ca i tlen, hrawkhrol lungput le firkhut mit-au, hna-tun te hna zong remhpiak/hlohpiak dih a hau.

Mizapi sin ah theihter le fianternak tuah (Public awareness)

Mah hihi a pakhatnak abiapi bik mi a si. Cacawnnak pakhat cu mizapi/mibu nih thil a si hnga dingmi a lamthluan kha fiangte in a theih hmasa hrimhrim a herh. Cuti a si caah, Australia ram Victoria State, Melbourne khua ahhin Laimi zeimawzat te minung in 2000 hrawnghrang kan rak si lio, 2007 kum lio ahhin Laica cawnnak tuah le ser khawh a si zia, a cawng kho hngami fanau le zong zeimawzat an um zia, acozah sin ah chuahpi ahcun a pomhlom/cohlan khawh zia le, hi Laica cawnnak nih Laimi fanau le an sianginn kai (university kai) tik ah zeimawzat pi a thathnem te hna lai, timi pawl  kha Khrihfabu meeting, community meeting le pumpak minung hna sin ah rak theihter le fianter (awaresness) pah lengmang a rak si. Cuti tuah hmasat lengmang hnu i mizapi lak ah mi tam-u nih an lung a hung fian hnu cun, ACC – Australian Chin Community nih rianhma a hun lak i, Melbourne khua ah Laica cawnnak sersiam dingin bia a hun chah phot. A herh mi committee zong a hun ser hnu ah, rianhma an hun lak colh ve. Cawn hnga ding ca/cauk (curriculum) serpiak dingin 2009 kum hram thawk ah CACC kha bomhnak a hun hal, a dih hngami tangka zong a hun kuatchih. CACC nih tang 1 in tang 12 tiang cawn ding zong a rak serpiak ve.

2010 kum hram thawk in Laica cawnnak nawl cu hmuh a si

2009 kum hram thawk ah CACC kha cawn hnga ding ca/cauk (curriculum) ser ding in bomh hal cu a si i, sermi cauk vialte cu July thla dih hlan ah ACC kut ah a hung phan. Cule cangka ACC nih VSL (Victorian School of Languages) zungpi-acozah sin ah cu curriculum cu a  chuahpi ve. VSL lutlai upa pawl nih an cek-hlat dih cikcek hnu ah October 2009 thla ah, Chin-Hakha ca le holh cu tang 1 in tang 10 tiang, 2010 kum hram thawk, February zarh khatnak ah cawn khawh a si cang, tiah ACC kha thawngtha an hun thanh hna.

Cule cangka cachimtu sayate lak, a kai hngami siangngakchia min cazin lak le timhtuahnak vialte tuah dih hnu ah February zarh khatnak 2010 kum thawk ah, Chin-Hakha Laica cu tang 1 in tang 10 tiang, Melbourne khua centre pahnih (Croydon centre le Sunshine centre) ah, sayate cachimtu 10 le siangngakchia 200 hrawnghrang he cawn hram cu hun thawk a si.

Hi Laica cawnnak hi mi cheukhat nih an theih palh theu mi, pomhlom/cohlan sawhsawh (recognize/permit) a si lo, anmah Victoria State acozah nih amah ta ah aa

​

lak (intergrate/ assimilate/incorporate) a tuahtu kha a si. Cucaah, VSL Laica cawnnak he aa pehtlai mi pohpoh cu acozah nawl lawngte a si dih cang. Kanmah Laimi zapi lei le, ACC lei nih cun VSL nih a herhmi bawmhchanhnak lawnglawng kha a pek khawh.

VCE (tang 11 & 12) cawnnak lei timhtuahmi

ACC nih Australia ram i Laica cawnnak a cawlcanghmi hi tang 10 tiang lawnglawng a si lo, a herh bikmi tang 11 & 12 (anmah Mirang nih cun VCE timi Victorian Certificate of Education) tiang cawn khawhnak hi a hram thawk tein rak i timhmi a si caah, cu VCE cawnnak hnga ding cu VCAA timi Victorian Curriculum and Assessment Authority thit-hruainak in 2011 kum thawk in Laica lei a thiam deuhmi nih VCE cawn ding cu sersiam a si. Cuticun kum zeimawzat chung tlamtlinh hngami criteria 7 kha cawlcangh, sersiam le tlamtlinh hnu ah, VCAA zungpi nih  VCE cawnnak cu 2014 kum tantim ah cohlan a hung si than. Cucaah, VCE conglawmhnak puai zong Australian Chin Federation civuipi lio October 2014 thla thawkka ah sunglawi ngai in tuah khawh a hung si. Cu VCE cawnnak onh hmasa bik kum cu, 2015 a si i, VCE tang 11 cu cawn thawk a si. 2016 kum ah VCE tang 12 ah hun peh colh a si. 2016 lio VCE tang 12 a kaimi cu siangngakchia  36 an si. Hi VCE tang 11 & 12 cawnmi cu, anmah Australian Standard ningin adang te in sersiam a si. Cu sersiam mi zong cu, anmah VCAA zulhphung le khiah ningte in Laimi lila nih sersiam hnu ah, VCAA nawl ngeitu expert pawl nih zohpiak, zohfel le remh dih cikcek hnu ah, Australian Standard thiamthiam in sayate nih chimh le cawnpiak a si.

Ca cu cawn lawnglawng in a za lo. A cawngmi nih zeitluk in dah a theih khawh,a thiam khawh le a purh khawh timi kha cek-hlat le a khing thlai a hau fawn. Cu caah, cu VCE tang 12 cawnni ca kha camipuai timi assessment/exam tuah a hau. Cu tuahmi assessment/exam zong cu Australian Standard ningin tuahto a hau fawn. Cu tuah hngami zong cu, anmah VCAA nawl ngei expert pawl le Laimi upa cheukhat (ca le holh lei a thiammi) nih an sersiam le a tuakhan thluahmah liopi a si. Kharpi camipuai assessment/exam cu 2016 October thla ah tuah a si te lai. Cu ahcun, Australia um Laimi nih Victorian Government bawmhnak in cawlcangh lengmang mi Laica cawnnak a theipar cu Laimi lila nih a va zun te hnga!

Siangngakchia nih VSL Chin-Hakha Language, VCE tang 12 camipuai ah an hmuhmi an marks cu university an kai duh tikah, total marks ah khan an fonhchih te lai caah, hi Laica cawnnak i hmuhmi an marks nih kan Lai ngakchia hna cu zeimawzat pi a thathnem te hna lai. Kha hmuitinh zong kha Laimi mi tampi nih a hun theih duahmah cang caah, 2010 kum Laica cawnnak thawkka I siangngakchia 200 hrawnghrang lawng a rak si mi kha, 2015 kum ah  300 le, 2016 kum ahcun 400 tiang an hung phan cang. 2016 ah VCE tang 11 minung 35 le VCE tang 12 minung 36 an hung si.

Cachimtu zong sayate 10 hrawnghrang in rak tuanmi kha, 2016 ahcun sayate 17 tiang an hung karh ve cang.

Hi vialte cawlcanghnak hi aho minung pakhat thiam hngalhnak le thawnnak in tuah khawh mi a si lo, Laimi zapi tanrualnak, lung i ngetnak, thazaang le thinlung chuahnak, Victoria State Acozah bawmhchanhnak thawng le, VSL zungpi le VCAA zungpi hna tanpinak, lam hmuhsaknak le thit-hruainak thawng lawnglawng in hmuhchuahmi, tuanchuahmi a si. A bik in, hi Laica cawnnak a kalpi tu, a sertu le a thit-hruai tu cu ACC a si ko. (Biakarlak tenh: Australia ah a um vemi upa pakhat nih, hi “Laica cawnnak hi keimah nih ka tuah” tiah rumro loin media le mi cheukhat sin ah a chim lengmangmi a um. Cu pa cu, Laica cawnnak hrih-hawhnak in atu tiang ah a voi voikhat taktak hmanh aa tel bal lo. Hi bantuk Laimi zong kan rak um ve hoi. Cu pa cu mawhchiat awk a um lem lo, ziah tiah, min langh le minthan rumro a duh caah a si ko lai. A chim mi zong hi ‘lih fangfaak’ a si ko caah, kha pawl kha cu, mah le mah i hlen lengah midang zong va hlen……..‘self deception” timi thinlung lei zawtnak phun khat a ngeih caah a si men lai).

Laica/holh cawnnak  data

Australia ram Victoria State ah cawn cuahmah mi Laica le Laiholh hi acozah nih amah ta ah aa chiah kan ti cang. Hi cawnnak hi sianginn kum, February thla hram thawk in November thla zarh thumnak tiang, Zarhteni poh ah cawn a si. Nain, a ni in ni 30 lawnglawng cawn dingin acozah nih khiah a si. Cu ni 30 chung ahcun, Zarhteni cawn caan hi zinglei sml 9.00am in aa thawk i, chun hnu sml 12.20pm ah a dih. Can karlak ah minit 20 dinh can a um caah, sml 3 chung hi cawn a si. Kum khat chungah sml 90 chung cawn a si. Cun, tang 1 in tang 10 tiang a cawngmi nih sianginn kai tlamtlinh ding (attendance) 75% tlinh a hau. Chim duhmi cu, ni 30 chungah ni 23 hrimhrim hi bau loin sianginn kai a hau, ni 7 a bau kho, tinak a si. Cun, VCE tang 11 & 12 a cawngmi tu cu, kum khat chungah attendance 80% (ani in, ni 30 chungah ni 24 hrimhrim sianginn kai a hau) a herh. Kum khat chungah ni 6 lawnglawng sianginn kai a bau kho, tinak a si. Hiti ning hin zulh ding a si nain, vanchiat ah Laimi theu cu, hoidang nupi thit ah nupi an va thi ve i, sianginn ah an ra ti lo. Zeidang puai le lam hna a um ah le, mah cucu “ a ruang” ah chiah an hmang hoi i, sianginn kai an bau lengmang. Mah cucu mawhchiat awk zong a that ve lonak a um ve. Zeicadah tiah, cheukhat hringsortu an nule an pale hna zong cu, Laitlang an khua in tuhmui, namtong le sei le hnam chiah tak le hlonh tak in ram 3nak a phanmi an um ve tikah, cu nule pale zong nih cun, a chimh awk le a cawnpiak awk zong thiam fawn ti hlah hna kaw, cu nih cun dang khat, an fale zong nih cun, Laica le Laiholh cawnnak khi har le fe in dahfawh an rak sersiam, ti zong theithiam ti hna hlah, cu zong nih cun dang khat hoi, cuticun kan buaibuhluk ko. Zeitik ah dik kan lung a va fim te hnga, zapi le zaran cu? Cuti  hnokcin kan si pah bu ah, lungsau thinfual le i theihthiam bu tein Laica cawnnak cu a tluang thluahmah rih ko! Ramdang um Laimi kan lung a fimnak ding hi cu, hmailei ah a tlawm bik kum 100 tal cu a rau rih lai dah? Ramchung um Laimi hna he kan i dang tuk rih men lai lo dah!

Biakilh

Hi bantukin kan Laimi caah hmailei fim cawnnak ah a bawmchan taktak ding, nunphung, ca le holh kilvennak caah a dir mi ACC (Australian Chin Community) bu hi Laimi tampi nih lawmh lo awk a tha lo. Kawlram acozah le Chin State acozah zong nih a tuah duh lo mi (hramhram in) / a tuah khawh lo mi Laica cawnnak hi Laimi nih i uanthlarpi lo in um khawh a si lo. Ram chung le ramleeng um Laimi zong nih mah le umnak cio ram le sining cio hoih in Laica cawnnak sersiam khawh cio ahcun a va tha tuk hnga dah! Cuti va tuah khawh rih lo hmanh ah, mah le umnak mibu (community) in maw, Khrihfabu hoih in maw, tuah cio ahcun thiltha tuk a si hnga. Kawlram acozah le Lairam acozah an lung a va fim te tik le, cu cacawn khawhnak lam an sersiam te tik khi cu, a va hlatpi rih lai dawh in a um? Cucaah, hawidawt hna, kan miphun le kan nunphung kilvennak ahcun Laica cawnnak lei hi hmual fak deuh in cawlcang cio usi!

******************************************

Note: F. Lai Len hi Chin Usi chan lio ah khan Chin ram kulh pumpi zungah Chin nunphung, ca le holh lei ah hotu (Director) a rak ttuanmi asi i atu ahhin Australia ram Melbourne khuapi ah a ummi asi. Chin miphun nih Chin miphun nunphung, Chin ca le holh lei ah kan ibochan ngaingaimi fimchimtu asi ti kha theihter kaan duh hna. Australia ram, Victoria pengkulh chung ummi Chin ca ke holh cawnnak ah kan ibochan ngaingaimi Chin pasal ttha asi. Pathian nih thluachuah vanluh pe ko seh. DSMaung