KAN CA, HOLH,  LE NUNPHUNG THLAU AHCUN

kan Chin miphun cu a tlau colh ko lai.

Pathian nih vawlei ah ca le holh le nunphung a ngeimi miphun pakhat in a kan ser.  Kan ca le holh le nunphung hna kan thlau ahcun kan miphun cu a tlau colh ko lai.

A bik in, ramdang ah a ummi Chinmi nih kan thlau tuan khawh mi a si.  

Kan umnak ram dang nunphung le chan a cak i a kan tei tuan khawh mi a si.  An ca le holh cu kan thiam a herh.  Nain, an nunphung nih kan Chin nunphung hi a dolh sual ahcun kan tlau ko lai.  Myanmar zong ah Chinmi tampi cu Kawl lak ah kan tlau cang.

Ca le holh le nunphung hi kan miphun dihlak in kan i bawmh i kilven a hau. Chinmi nih thil thuam phun tampi kan ngeihmi hna hi a sunglawi tuk.  Holh tampi kan ngeihmi hi kan thlau lo ding a si.  Mi zapi nih kan hman khawh mi holh zong kan ngei te lai.  Kan Chinram hi umkalnak a awl deuh lengmang lai i hmun khat ah kan thudir kho deuh lai.  Kan holh aa dang rua tiin kan ruahmi hna hi a hram an i khat dih hna caah kan i hrawm kho dih te ko lai.  Chan tha nih kan ca le holh thiamnak ding ah a kan bawmh ngai cang.

Lai holh le Mizo holh hna hi kan taksa pum then min hna cu 90% aa khat. Hmun dang ah kan cawng lo.  A kan chimtu aa khah caah a si lai.  Nu pakhat nih a kan chimh caah a si lai.  Mother's University ah kan cawn ti caah a si lai. Kan dihlak Chin kan si dih.  Hmailei ahcun kan i hngal kho ngai te ko lai.

Mah miphun ca le holh le nunphung hna kan tanh lo ahcun miphun dang sal ah a taang ding kan si ko.  Uknak lawng in saltaang kan si lo.  Ca le holh le nunphung in saltaang kan si rih. Biaknak in saltaang kan si rih.  Zalawng tein kan tuah khawhmi a um lo. Saltaang dirhmun ah kan um.  Kanmah tein i ser kan hau.  Kan duh lo ahcun mi dang sal ah kan taang peng ko lai.

Ca le holh le nunphung cu bu pakhat lawng nih kilven khawh mi a si.  A ngeitu dihlak nih hmun khat ah kan hman ti a hau.  Cu caah, Leikhuaza Laitlai Chin upa hna cu kan ca le holh le nunphung thanchonak kong ruat ti ding in Lawngtlai, Mizoram ah November 14 - 15, 2015 ah tonnak kan ngei.  A tu hi kum khat a tling ve. 

Hi tonnak ah International Chin Christian Fellowship [ICCF] hi dirh i kan ca le holh le nunphung thanchonak caah riantuan ti ding in hnatlaknak tuah a si.  June 9, 2015 ni ah Indianapolis, IN i ICCF upa hna nih International Chin Christian Council [ICCC] tiin a min an thlen.  Chin Bible,  Hla Cauk, Bible Hrilhfiah, le biaknak lawng si lo in vawlei fimnak cauk hna zong mah le holh tein rel khawh ding duhnak ngeih a si.  Hi riantuannak hi Laitlai Chin khrihfabu hna nih thazaang kan pek cio ahcun ca le holh in kan thang lai.

International Lai Christian Leaders Tonnak

Lawngtlai, Mizoram

November 14-15, 2014

Pathian thangthat tinak:

1. Vancung Member Kan Si:
 https://www.youtube.com/watch?v=xtiLJO03ziE

2. Halleluaia Chorus: 
https://www.youtube.com/watch?v=fmVpDmG8NWE

3. Kan Khualtlawnnak Vawlei: 
 https://www.youtube.com/watch?v=lV7645ChTKA

4. Na Pennak Tlung Cang Seh:
 https://www.youtube.com/watch?v=f1EYhU72jEo

Lai Cultural Nite

1. Sal can kan zuam hrim ti ri lo
 https://www.youtube.com/watch?v=Smlx2Er2PbI

2. https://www.youtube.com/watch?v=UeBfuuP8mxo

3. https://www.youtube.com/watch?v=hjnso-jb6KM