CHINRAM LE HARTUARMI CHINMI HNA
July 28 - August 01, 2015 ni ah Komen thlichia nih Chinram ah ruah fak tuk in a sur ter. Chinram tlang sang vialte cu van ruah ti nih a man ter hna. Cu ti cun, kan miphun thinlung a hnem tawntu tlang hna an min. Vawlei hna an tolh. Chin khualipi Hakha khuasa inn 732 cu hngah awk tha lo in an rawk. A tlu taktak tung lo in hngah le um thanuam lo mi inn tampi an um. Minung 7000 hrawng cu umnak ngei lo in camp ah an um hna. Chinram khua tampi ah harnak tuarmi chungkhar an tam taktak.
A tu cu Kum Thar 2016 chung ah kan lut. Christmas 2015 le Kum Thar 2016 cu kan lawm. Pathian kan thangthat hna. Kan miphun nih vanchiat puicimh a tonnak hi thla ruk a si cang. Nain, harnak tuarmi hna cu anmah sining tein an si rih ko. Ni fatin nunnak caah ti le rawl pek hau an si peng rih. Umnak inn le lo an hngak ko hna. Chinram ah harnak kan tonnak hi kan i fimtawl khawh nak ding ah a tlawm bik kum thum cu kan rau lai.
Cu caah, Chinram ah hartuarmi kan miphun hawi hna hi philh hrimhrim hna hlah usih. Kan chungkhar in ti le rawl kan dum ti lio ah kan Chin ram ah ti le rawl ei awk ngei lo in mitthli he khua a sa mi kan miphun hawi dawt hna hi philh hna hlah usih.
Kan khualipi le khua dangdang ser than an hau. Cu caah Chin State Municipal Director Pu Thla Hre cu CBCUSA nih a tuahmi Chin Relief and Rebuilding Committee [CRRC] nih US ah kan sawm i US ram ah a len lio a si. Indianapolis, IN ah sau a cam hnu ah Washington, DC ah kan hnu zarh kha a cam. Nikhatni ah Indianapolis, IN ah a ra than. Nizan [Ningani] ah Dallas, Texas lei ah a zuang than. January 28-29, 2016 ah CRRC meeting a kai ve lai. Indianapolis, IN in Milwaukee, Wisconsin ah a kal lai i Chicago, IL in Yangon, Myanmar ah a zuang than lai.
US ram chung ah khua le ram an serning a hmuhmi vialte nih Chinram khualipi le khua dang vialte an serning hna hi chanthar sining in inn le lo saknak a bawmh hrimhrim ko lai tiah kan zumh ko. Kan i lawm taktak.
Vawleicung ram kip ah a ummi Chinmi zumtu kan i bawmh a hau. Ram kip in kan Chinram/Lairam ah bawmhnak tuah peh cio hna usih.
Pu Thla Hre Biachimmi
No comments:
Post a Comment