LAI CA LE HOLH LE NUNPHUNG THANCHONAK

      Hakha [Laitlai Chin] hi Chin Association for Christian Communication [CACC] tiin Baptist Association 13 le UPC le Methodist Church hna komh in ca le holh le nunphung riantuannak kan ngei.  

   

 CACC Silver Jubilee [April 2013]

[tang] Chinmi umnak vawleipi

      
        Ramdang ah:

(a)   USA ah Chin Baptist Churches USA [CBCUSA],

(b)  Europe ah Chin Christian Association of Europe [CCAE],

(c)  Australia ah Chin Christian Council in Australia [CCCA] timi khrihfabu tampi komh kan um hna. 

(d)  India ram ah kan miphun hawi Lairam Jesus Christ Baptist Church [LJCBC]  

(e)  Bawm, Bangladesh ah Evangelical Christian Church [ECC] le Hill Tracts Churches Fellowship an um.  Lai ca le holh a hmangmi kan si.

Kan Ruah Dingmi

Hi tluk in Laitlai Chin khrihfabu hna kan tam nain, ca le holh le nunphung kong ah kan tuahmi a um lo tluk a si.  Bible Hrilhfiah hi Lai Khrihfa Catialtu Phu [LKCP] nih an tial nain cantling rian ngeih bu in an tial caah fawi ah an liim lai lo.  Catial hi hlawh pek in cantling riantuantu (2-4) tal ngeih kan hau. 

Miphun pakhat kan si ahcun a tanglei hna hi Lai ca tein chuah kan herh ve:

1) Lai Baibal Thiang

Kan pa tleicia Dr. David Van Bik nih Lai Baibal Thiang cu Mirang Bible “Today English Version” in a kan lehpiak.  1978 kum ah an nam.  Laitlai Chin dihlak nih ngeih khawh ding in a um fawn lo.  Hi Bible hi kum 5 ah uk 100,000 lengmang tal cu nam kan hau.  Cun, miphun pakhat kan si ve caah Mirang Bible phun khat lawng si lo in, phun hnih tal ngeih a tha rih.  A let le tialtu i fial kan hau.   

2) Ngakchia Bible

Uk khat cu a chuak cang.  Nain, mi tampi nih kan ngei kho rih lo.  Laitlai Chin ngakchia dihlak ngeih ding in chuah kan hau hna.  Tial chap le nam chap a hau rih.

3) Bible Hrilhfiah

Bible Thiang ah uk 66 a um.  A dihlak in hrilhfiah tial kan hau.  Uk khat hi a tlawm bik copy 10,000 in chuah ahhin uk 66 ahcun 66 x 10,000 = 660,000 chuah kan hau.

4) Bible Dihlak Komh Hrilhfiah Cauk (One Volume Commentary)

Cauk pakhat chung ah a tawifiang in uk 66 hi tial in nammi cauk ngeih kan hau.  A man a fak deuh lai.  A tlawm bik ah uk 10,000 tal chuah kan hau lai. 

5) Pulpit Bible

Biakinn pakhat ah pakhat cio pulpit cung ah toh ding mi Bible lianpi kan herh.  Vawleicung Laitlai Chin dihlak caah uk 10,000 tal cu kan herh theu lai.

6) Bible Caang Kawlnak Cauk (Bible Concordance)

Pakhat cu a chuak cang.  A dang a lian le a fa he phun tam deuh tial kan hau rih.

Uk 20,000 hrawng nam a hau. 

7) Bible Dictionary (Bible Biafang Fianternak)

Hi cauk cu a lian le a fa he phun tamdeuh ngeih kan hau ve.  Laitlai Chin dihlak caah a tlawm bik uk 20,000 tal nam hau ding a si.

8) Bible Theology Cauk

Biakam Hlun le Biakam Thar le Bible Biathlung fianternak cauk cu phun tampi tial a herh ve. 

9) Sunday School Cauk (Ngakchia)

Phun tampi in tial a hau.  CBCUSA nih phun 6 in a chuah.  Uk 6000 a nam.  Vawleicung Laitlai Chin khrihfabu sin ah a kuat.  A taktak ahcun SS ngakchia pakhat nih uk khat cio an ngeih awk a si.  Mino zong nih an herh ve.  Uk 12,000 hrawng hi kum khat ah vawihnih chuah a hau.  Kum thum ah vawikhat tal in tial than lengmang a hau.

10) Sunday School Cauk (Upa)

Upa nih Bible Bia Thiang hi kan cawn a herh ve.  Bible kong kan fian lo ruangah khrihfabu chung ah buainak tamtuk a chuak.  Kan thlarau nun a than khawh nak ding caah Upa Sunday School cawnnak cu kan tuah hrimhrim a hau.  American khrihfabu vialte hi Sunday School kai lo mi kan um lo.  Pumh hlan ah suimilam pakhat cu Sunday School cawnnak ah an hman.

11) Khrihfa Nunzia le Hnemhnak (Ethic & Counseling) Cauk le Khrihfa Innchungkhar kong cauk

A phunphun in tial ding kan ngei. 

12) Khrihfa Hlabu

Hla Cauk cu solfa le tanbo he phun hnih kan ngei.  Laitlai Chin chungkhar dihlak nih kan ngeih awk a si.  Uk 100,000 hrawng cu nam kan hau.  Kum 5 or 10 ah vawikhat tal cu nam than lengmang kan hau lai.

13) Khrihfa Hlaremh Cauk:  Tampi chuah a hau.

14) Khrihfa Hla DVD le CD cu chuah lengmang a herh.

15) Khrihfa biaknak movie cu Lai holh in ngeih kan herh.  Mizo le Kawl nih cun an ngeih cang.  An ca le holh a thancho ter ngai.  Vawlei lei movie zong an holh in an leh hna.  New Delhi, India ah a ummi Lai ngakchia nih hi movie an zohnak in Mizo holh lawng tein holh an i hrawt.

16) Biaknak Caphel (Tracts): A phun phun in thla fate in maw kum cheu vawikhat ti bantuk in chuah a hau.

17) Biaknak Newsletter le Flyers: Thla fa tein chuah a herh.

18) Chin Khrihfabu Tuanbia Cauk:  Chinram in ramdang ah Chin khrihfabu hna kan tuanbia hi tial ding tampi a um.  Mission rian kan tuannak tuanbia aa chap lengmang lai.

19) Chin Miphun Tuanbia:  Hlan pipu hna tuanbia le nunphung kong tial kan hau.

20) Laitlai Chin Printing Press le Caruuk:  Hakha khua ah ngeih ve kan hau.  Lai ca le holh cu CACC, Hakha in a chuah lengmang awk a si.  Kan Chinram khualipi Hakha khua in ca phun tling chuah a hau.

21) Hakha khua ah Siangbawi te Thlanmual:  Dawh tein tuah awk kan si.  Inn tha deuh zong sak in thlacamnak hmun ah hmanh khawh ding in ser kan hau.  Ramdang mileeng (tourist) nih an len duh ding in tuah kan hau hna.

22) Laitlai Chin khualipi Hakha le khuapi Lawngtlai pehtlaihnak:

Laitlai Chin churches nih hawikomhnak ser kan hau.  Gospel team in maw, pakhat khat in pehtlaihnak ngeih zungzal a tha.  Kan nunphung le ca le holh a karh ciahmah cang.

23) Bawmram, Bangladesh Laitlai Chin hna he hawikomhnak:  An chuahsemnak Hakha le Lungzarh khua hna cu nihin tiang an philh lo caah hawikomhnak tha tein ngeih ding.  Thisen khat si hrat ahcun Chinram ah harnak ton tikah Evangelical Christian Church [ECC] le Hill Tracts Churches Fellowship, Bangladesh nih Hakha ah bawmhnak an tuah.

24) Laitlai Chin lak in Minthang Hlasakthiam Chuahnak:

Lai Idol le Chin Idol cu tuah piak lengmang tlak a si.  Kan miphun dihlak min in Hakha le Lawngtlai ah tuah lengmang a tha.  Mah umnak ram cio ah tuah a tha fawn. CYO nih tuanvo an ngeih caah a tha tuk mi a si.

25) Laitlai Chin Bible Sianginn le University:  Hakha ah Chin Christian Univerity (CCU) le Matupi ah Union Theological College (UTC) thanchonak cu ruah zungzal ding a si.  Bible fimnak le vawlei fimnak in thanchonak hmun a si. 

26) Laitlai Chin cathiammi hna ramdang cacawn khawhnak lam kawlnak:

Chinram ah a ummi fanau le hna nih ramdang ah sianginn an kai khawh ve nak ding tiang in a lam kawl ding a herh.  Buu riantuannak a thawn a hau.

27) Chinram le ramdang ah Laica cawnnak cu biatak tein thapek kan hau. .  Laica hi cawng cio ding in thazaang pek ding.  Lawngtlai, Mizoram ahcun 8^th grade tiang Laica cawnnak an tuah.  Australia ahcun college kainak caah cawn ding mi ca le holh phun khat ah a cang cang.

28) Kan miphun thilthuam hna zong a sining tein kilven ding. 

29) Ramkip um Laitlai Chin hna thlarau thazaang kan i pek i kan bia le hla in kan than ti a hau

30) Chinram ah Lai Radio le TV in Khrih Thawngtha chim khawh nak program ngeih ding.

Biaknak lei lawng hmanh in calei riantuan ding cu a tam taktak.  Kan tialmi hna lak ah kan tuah khawh mi a um rih lo kan ti lai.  Lai Bible Thiang phun khat le Khrihfabu hlabu phun hnih kan ngeih mi lawng hi an si rih. Hi vialte hi aho nih dah a kan tuan piak lai?  Laitlai Chin zumtu hna hi kan thu sawhsawh ko lai maw?

Kanmah nih kan tuan lo ahcun aho nih dah a kan tuan piak lai!

C Duh Kam, EM

CBCUSA