INTERNATIONAL CHIN CHRISTIAN FELLOWSHIP [ICCF] 

[Hrihhram tuanbia]

I. Chin Baptist Churches USA [CBCUSA] nih ICCF kong Hmalaknak: 

               CBCUSA nih phunghram le phungtteng a ngeih ning in rian a ttuan.  Phunghram ah aa tinhmi hna cu:

1) Pathian Thawngtha karternak rianttuan tti ding
2) CBCUSA khrihfabu hna nih thlarau lei in thanchonak
3) America lawng si lo in, Kawlram le Chinram ah a ummi Chinmi hna fimnak le pumsa le thlarau in thanchonak
4) Lai nunphung, Laica le Laiholh hna thanchoter ding.

TINHMI - 1nk: Pathian Thawngtha Chimnak: 

1) Hi tinhmi kan ngeih caah kan Lairam ah thlarau a tlaumi hna tlaihnak rianttuan ding in International Chin Baptist Mission [ICBM] hi July 13, 2013 ni ah onnak tuah a si. 
2) CBCUSA ram chung ah minung pakhat $25/yr in kan thawh i Khrih zumhnak in rian kan ttuan.  Khrihfabu le pumpak chungkhar nih missionary pakhat ah $2000 in an cawm hna.  Missionaries dihlak 60 reng lo nih Khrih Thawngtha cu Gangaw, Kanpalet, Mindat le Paletwa peng ah an chim cuahmah.
3) Missionaries hna tthihruaitu le bawmtu rianttuanmi hna cu ICBM Myanmar Director le Field Directors 4 an si.
4) Rian kan ttuannak i Baptist Associations rianttuantu hna kha an khrihfabu an santlaih rih hna lo caah bawmhnak kan tuah cio hna.
5) Biakinn sakpiak.


TINHMI - 2nk: CBCUSA ram chung khrihfabu hna thlarau lei in thanchonak

1) Ram chung ah Departments kip in kan ttuan.  Ministers Council members hna nih thazaang hrimhthannak training an tuah.  Mino an tli. Nubu an cawl.  Training an tuah.
2) Leadership trainings le Sunday School trainings tuah a si. 
3) Thawngtha chimnak hi thazaang kan pek, khrihfabu kip sin ah Khrih Thawngtha cu aupi kan i zuam.  Thlarau tlaumi tlaihnak mission rian a ttuantu hna hi tthawn hmasat kan herh caah biapi taktak in kan ruah.
4) Ngaihchiat ton tikah i bawmhnak CBCUSA Relief Fund zong kan tuah.  Ngaih a chia mi thlarau le thinlung damnak a si.
5) Bible siangngakchia hna cu scholarship a pek hna.

TINHMI - 3nk: America lawng si lo in Kawlram le Lairam ah khuasa Chin miphun hawi hna fimnak, pumsa le thlarau in thanchonak.

Pathan thawng in kan ttuanmi hi a tam ngai cang.  Phaisa hrim in a tam tuk cang.

1) Lairam mangttaam le innkaang meitet bawmhnak, 
2) Bible sianginnn le siangngakchia hna bawmhnak,
3) Hakha sizung chapel sak, 
4) Hakha Agape Clinic le Thantlang Bethel Clinic le Lai Baptist Church, Mandalay Health Ministry bawmhnak
5) Kawl lak ah a tlaumi Lai a kawltu Chin Funtomnak Bu (CFB) bawmhnak
6) Kawl rawn ah Chin khrihfabu herhhai dangdang bawmhnak
7) Delhi Chin ralzaam ngakchia sianginn kainak caah bawmhnak
8) A dangdang harnak a tongmi cu a bawmh len ko hna.

TINHMI - 4nk: Lai nunphung, Laica le Laiholh thanchoter ding

1) CBCUSA Christian Education & Literature Department nih Sunday Cawnnak cauk le cauk dangdang a chuah.  Laica rel ding a tam khawh nak caah aa zuam.
2) Ram dang ah Laica cawnnak tuah cio ding in thazaang a chuah.
3) Lai Bible Hrilhfiah ttialnak a tawlreltu Lai Khrihfa Cattialtu Phu [LKCP] kha 2007 in a tu tiang bawmhnak a tuah cuahmah.
4) A phichuak a nganbik cu International Chin Christian Fellowship [ICCF] a chuahnak hi a si.


ICCF Hrihhram Tuanbia Tawi

CBCUSA nih Lai nunphung le ca le holh thanchonak rian cu biapi tuk in a chiah caah phunghram pi 4nk ah aa hunh.  CBCUSA Board of Trustees (BT) 11nk Meeting ah hnatlaknak a tuah hnu ah CBCUSA Officers Council [OC] nih a lam a kawl.  A peh zulh.

CBCUSA 11nk BT Meeting cu a tanglei bantuk in tuah a si:

Hmun: Chin Baptist Church - Texas, Lewisville, Texas
***Theihfian deuhnak caah Chin Baptist Church - Texas cu Dr. Chum Awi khrihfabu a si. An khrihfabu kum 15 tlinnak chuahcam te ah BT meeting hi an i ham.  

Ni: March 14, 2014 (Friday)

Meeting kaimi BT members: 94

1) CBCUSA BT 07/2014 (Biakhiahnak No.) ning tein November 2014 ah Lawngtlai, Mizoram ah vawlei cung biaknak buu upa hna tonnak cu ngeih ding in le CBCUSA nih officers pahnih kha thlah ve ding in hnatlaknak a tuah.

2) Hi meeting kainak caah CBCUSA BT nih $20,000 cu budget ah a telh.  CBCUSA Vice Presdient Rev. Tial Lian le EM Dr. C Duh Kam lawng kan kal caah tlawm kan hman.

3) CBCUSA BT nih hnatlaknak tuah hnu ah EM le OC upa hna nih hi meeting a can khawh nak ding ah kan tawlrel.  Ram kip biaknak buu upa cu kan i sawm hna.  Hi meeting tuahpiak ding in Lairam Jesus Christ Baptist Church General Secretary Dr. Lalpekhlua Lahnim le upa dang kha kan chimh hna.  An kan cohlan.  November 14-16, 2014 ni ah Pathian lamhruainak in tlamtling tein an kan tuah piak khawh.  An cung ah kan i lawm.

4) Pathian rian ttuanttinak le Lai nunphung, Laica le Laiholh thanchonak caah rianttuan tti ding in ICCF cu tuah a si.  ICCF hi kan nunphung, ca le holh hi kan umnak ram cio ah a nun khawh nak ding ah rianttuan ding in sermi a si.  

5) Hi bantuk in hawikomhnak kan ngeih caah Laica le Laiholh ram hi a kau chin lengmang lai.  Lairam (Chinram) le Kawlram lawng si lo in, Lai Autonomous District, Mizoram le Bawm, Bangladesh nih kan ca le holh cu hman duhnak an ngei cang.  A bik in, Lai Autonomous District chung ah Laifa si ko nain Laica le Laiholh a thiam lo mi tampi nih cawn duhnak an ngei.  Lai hla cu an sak ngai ngai cang.  Sianginn ah 8th Standard tiang Laica cawnnak cu an timh cang.  Cauk an tial dih cang.  Kawlram chung ummi Laitlai Chin pawl tu hi kan cozah nih kan ttemttawn kaw, kan cawl kho lo.  

Kan Nunphung le Ca le Holh cu kilven kan herh:

Mizoram in Delhi ah a ummi Laitlai Chin cu kan leeng pah hna.  Ralzaam in thong tam ngai an um.  Milu an zawr deuh ko nain, Thantlang khua tia an si rih.  Ngakchia an chuah i holh an i hrawtnak hi Mizoholh a si.  Ka rak thei bal lo.  Vaiholh in an i hrawt kho men tiin ka ruah bal hna.  A rak si lo.  Ramdang ahcun Lai ngakchia holh an i hrawtnak cu Mirangholh a si.  Kan fa le nih kan nunphun, ca le holh an thlau ni le kum cu kan miphun tlau ni a si ko lai.  Cu caah, kan nunphung, ca le holh kilven hi kan rian cio a si.

Pathian sin ah thlacam cio ding in:

Pathian cu Amah kan hngalh khawh nak ding ah minung kan nunphung ah Aa phuang.  A bia cu holh in chim hmasat a si.  Nain, A bia aa palh lo nak caah ca in ttial a si.  Hi hi Bible kan si mi hi a si.  Pathian cu miphun pakhat sin ah aa phuang.  Pumsa in an nunphung le ca le holh ah a tthang.  Cu ti cun vawlei cung mi dihlak sin ah A bia cu phuan a si.

Pathian biaphuannak (Evangelism) le ca le holh le nunphung hi aa tthen kho lo.  Laica, Laiholh le Lai nunphung dirpi hi Bible he aa kalhnak a um lo.  Pathian rian ttuannak ah sullam a ngei bik mi le hmual a ngei bik mi a si.  Miphun hram a sih ter.  A feh ter.

         ICCF nih Lai nunphung, Laica le Laiholh in Pathian ram kauhnak caah rianttuan aa timh tikah ttih ding a si lo.  Kan nunphung, ca le holh cu kan ttih ne ahcun kan tlau ko lai cu teh.  Kan miphun hi a tlau ahcun zei dah ttuan man kan ngeih kun lai!

         ICCF rianttuannak hi thazaang pe usih.  Thlacam cio ding ah Bawi Khrih min in kan sawm hna.


Dr. C Duh Kam
Executive Minister of CBCUSA, Indianapolis, Indiana
Convener of ICCF, Indianapolis, Indiana