KAN MIPHUN NICHUAHLEI ARFI

Jesuh Khrih Chuahnak

Nichuah lei arifi zohthiam hna nih Khrih arfi cu an hmuh.  Nichuah lei in Jerusalem ah an ra.  "Judah siangpahrang a si lai ding mi ngakchia a chuakmi cu an kawl.  Siangpahrang Herod nih cu bia cu a theih tikah a awlok a chong ngaingai (Matthai 2:1-12).  Cu arfi cu Herod sin an phak lio ah a lo.  Herod inn in an chuah tikah cu arfi cu a lang than. Khrih a umnak cungah a dir.   Mifim hna cu an i lawm tuk (Matthai 2:9-10).

Siangpahrang Herod nih ngakchia cu nan hmuh tikah ra ka chim u law ka biak ve lai (Matthai 2:8) a ti nain, Pathian nih nichuah lei mifim hna cu an zanmang ah Herod sin ah kir ti lo ding in a chimh hna (Matthai 2:12).

Bawipa vancungmi nih Josef cu "Tho law, ngakchia le a nu kha i kalpi hna law Izipt ram ah va zam u," a ti.  Cu ti cun, Jesuh Khrih le a nu le pa hna cu Izipt ram ah ralzaam (refugee) ah an cang ve (Matthai 2:13-15).

Kan Miphun Arfi

Pathian nih kan Chin miphun hi Khrih ton awk ah nichuah lei arfi a kan zulhter.  Kan Lairam ah Khrih a chuah kum cu 1899 a si.  Hakha khua ah siangbawi nu le pa Rev. Arthur le Laura Carson nih Khrih Thawngtha cu an rak phurh i hi khua fa te ah kan miphun Khrih cu a chuak.  

Kan Laimi nih hmun kip in nichuah lei arfi cu kan zulh thliahmah ve.  Kum 60 hrawng kan zulh hnu ah Herod inn ah kan i su tut i kan ar ko hna.  Kan kal tawnnak lam kan zul kho lo.  Kan bia le holh te hmanh cu kan chim kho lo.  Kan cawng kho lo. Khrih ruang ah kum hnih ri in a tang lei pa ngakchia nih thihnak an tuar bang kan miphun nih harnak fak piin a tuar ve.  

Arfi thiam hna nih Siangpahrang Herod an hrial bang kan miphun cheu khat nih harnak hna cu hrial in Jesuh le a nu le pa bang ram kip ah ralzaam in khua kan sa hna.  Kan nichuahlei arfi cu ruah lo in a lang tthan.  Zalawng tein Khrih cu kan thangthat kho.  Laksawng kan pek khawh ve.  

Kan Miphun Arfi hi a loh tthan lai phan a um taktak. 

Bible ah a langmi Izipt ram cu Jesuh a nu le pa an i dornak a si.  Josef nih a pa Jacob le a unau rual hna cu mangtaam in a khamh nak ram a si (Genesis 46 & 47).  Hi Izipt ram ah Jacob hrinsor Israel miphun cu sal ah an taang beh (Exodus 1:1-22).  Moses cu Izipt mi hna tang ah sal a taangmi a miphun hawi hna ruang ah a lung a fak.  Miphun a dawtnak le mi toidor a sinak cu Pathian nih a theih.  Exodus hruaitu ah A ser (Genesis 3 & 4).

Kannih Chin miphun zong thluachuah tampi kan dong kan ti lio ah kan miphun arfi hi tlau kho a si ve.  Miphun dang nunphung le ca le holh nih hloh khawh kan si.  Herod bantuk siangpahrang cu kan tong theng lai lo.  Nain, miphun dang nunphung ah sal si cu a awl te ko.  Miphun hawi dang tampi an tlau cang.

Kan umnak ram kip ah kan nunphung le ca le holh cu kan thiam le kan kilven a herh.  Kan kilven khawh nak ding ah Jesuh a chuahnak hmun lei ah a kalmi arfi kha kan zulh i Vanbawi Messiah a thangthat ko mi kan si zungzal a hau.  Zumtu tha kan si ahcun kan miphun tukhal ttha zong kan si ko lai.

Nihin Kan Zulhmi Arfi A Fiang Cang

Mah te lawng in kan nunphung le ca le holh kilven a har caah ram kip [North America, Europe, Australia & New Zealand le Asia] in dir tti kan hau.  Kan Bible le Hla te hna hi rel le sak kan thiam a hau.  Hi vawlei pi cung ah Chin Pennak cu kan dirh a herh caah International Chin Christian Fellowship [ICCF] cu a chuahnak a si.  Kan kalnak ding lam cu a fiang ko cang.  Khrih lam kan zul lai.  Khrih lawng hi kan Chin miphun a himtertu Tukhal Tha a si zungzal lai.

ICCF Hlaremh Ngaih Tha tete

1) ICCF Pathian Thangthat
2) ICCF Pathian Thangthat
3) LIKBK Choir
4) Local Church Choir, LIKBK
5) ICCF Cultural Nite (11/14/2014)
6) Victorian Chin Baptist Church, Melbourne, Ausie Sunday Pumhnak
7) CBCUSA REGION 4 YOUTH CONFERENCE