CHINRAM LEI AH KAN THINLUNG LE THLARAU AN HOI HNA

Chinram cu Pathian nih dawh tuk in a sermi a si.  Pangpar dawh zong a par khawh nak ram a si.  Kan khuacaan a tha tuk.  Seh in a kik le lum pek kan hau lo.  Khuasik caah angki lum jacket pakhat ngeih ah a za ko.  Thal caan ah a kik kan hau lo.  Thlizil nem te a hrang mi nih zangdam tein a kan umter khawh.  Ramdang ah a kik le lum caah phaisa tamtuk kan liam. 

Tikik cawk kan hau. Lairam ahcun Pathian sermi rial tikik te kan ding kho.  

A kik le a lum caah phaisa liam a hau lo.  Pathian nih a kan liampiak kan ti ko lai.  

Pathian nih Lairam cu vawlei cung ram nuam pakhat ah A sermi a si.  

Kan sifah ruangah cu hlan cu nuam in kan hmang kho lo. 

 Nain, sifah sal kan taannak chung in kan luat dengmang cang.  

Nuam tein kan Lairam hi kan hman khawh zau ko lai.  

Kan Lairam le thing le ram hna hi kan dawt a herh.  

Pathian nih a kan serpiakmi aa dawhnak hi 

hmuh khawh ding in sersiam kan hau.

Vawlei cung ah a rummi ram hna cu a kik taktakmi khuacaan a ngeimi an si.  Lairam cu khuacaan a that tuk caah le fing tlang aa dawh tuk caah ramdang mi nih an rak len duh ngai ding mi ram a si.  February 13 - 20, 2015 ah Thlang Lairam Kanpalet - Mindat - Matupi - Rezua - Gangaw ah ABCUSA GS Dr. Roy Medley le Dr. Paul & Gail Aita he 

kan tlawn lio ah Lairam fing le tlang an hmuh ah an i nuam tuk.  

Tum i hmanthlak lengmang an duh.  

Kawlrawn ahcun Yangon le Mandalay ah kan um zong ah zapi santlai lo nih a kik 

kan ngei kho lo.  Kan thlan a chuak.  Fikfa nih a kan seh.  Khiangthong chung ah 

thlan belbul in um cu hell ram fate bantuk a si.  Thlan zahnak in 

i zah zong a awl lo.  A tlawn in tlawn ding ah a tha.

Lairam ahcun kan hir a zaang.  Hmai panh tein um khawh a si.  

Ngaknu nih an i tamhnak podar zong thlan nih a hnawt kho lo.  

An i dawh kho peng.  Nitlang nih hmai a kangh ve lo.  

Pathian nih a kan serning tein dawh tein um khawh a si.  

Pathian thluachuah kan dong ve cang. Duhnung deuh in 

kan van i ttamh kho ve cang.  

Zapi hmun khat um zong ah rim a chia lo. Hmun khat pi ah 

Pathian thangthat tti khawh a si.  

Hi tluk aa dawhmi Lairam tlang sang hram ah a ummi Hakha khua cu 

Lairam siangbawi nu le pa Arthur le Laura Carson zong nih Khrih Thawngtha 

chimnak hmun ah an rak i thim.  Hi ka hmun in Lairam dihlak ah 

Khrih ceunak Thawngtha cu an chim.  

Nihin ah Khrih Thawngtha nih a phanhnak hmun cu an thangcho 

hmasa deuh hna.  Laimi zong kan thangcho ciahmah ve cang.  

Nihin ah vawlei nikhua caan chia nih a kan phak ruang ah Hakha khua hi 

rawk hmanh sehlaw hmun le tlangthluan tha kan ngei tung ko.  

Chan tha le chan thar chung ah kan um.  

Pathian nih A kan bawmh lai i Hakha khua cu 

dawh deuh in ser khawh a si ko lai.

A lumnak hmun rawn ah Chin khuapi hi thial a hau lo.  

Kawlrawn naih rumro ah um hi kan duh awk a si lo.  

A kik man kan i pe kho lai lo.  Kan nun re a thei deuh hrimhrim lai.

Hakha khua cu hmun thar Chin State Office in Thantlang lam thluan le 

Falam lam thluan in Hniarlawn le Nabual le Chuncung tiang a peh in 

um khawh a si.  Cu hlan nak dawh deuh in ser kan i zuam hna lai.  

USA khuapi Washington, DC ahcun Zarhpini pumnak kan kal tikah, le chungkhar 

kan i len tikah meng 50 reng lo mawtor kan khalh.  Suimilam pakhat kan rau.  

Lairam he tahchunh ahcun Hakha in Falam pin Vaar hlei tiang a si.   

Dallas, Texas cu khuapi lian a si.  

An i pumhnak le an i lennak cu DC tluk dengmang an si ve.  

(1) Hakha le Falam karlak hi meng 42 lawng aa hlat.  

Mawtor lam hi pe 60 kau in i ser dih seh, lam kam ah mei vang dih sehlaw 

suimilam pakhat lawng kan rau lai.  

A tlawn in kan tlawng ti lai lo.  A len in kan leeng cang lai.

(2) Tedim le Tonzaang cu tuan te ah phak khawh a si.

(3) Thantlang cu meng 20 lawng a hlat caah zatkuat pakhat in ruah ding a si ko.

(4) Hakha le Rezua cu meng 105, le Matupi cu meng 173 hrawng a hla.  

Suimilam pahnih le pathum hrawng lawng kan rau lai.  

(5) Hakha in Mindat, Kanpalet le Paletwa cu ni khat ah kan phak khawh lai.  

Lam tha kan ngeih ahcun ni khat ah kan phan kho lai.  

Lairam khuapi sernak caah hmun tthial a hau lo.  Lairam chung khua karlak 

lam hna tu hittha tein ser kan hau.  Mawtor tha deuh a ngei kho mi si kan hau.  

Ni khat khat ahcunLairam kan bawi upa pawl zong hi 

nan chuahnak khua in zung nan kai kho te ko lai.  

Kan van a chia i Hakha khua hi rawk hmanh sehlaw hmun thar ah 

chan he aa tlakmi khua dawh ngaimi tu kan ser piak u.  

Dr. Yonggi Cho khrihfabu member cu 760,000 an si.  Los Angeles, California ah 

khrihfabu 50 reng lo a ngei.  China le Japan hna zong ah member a ngei.  

Dr. Yonggi Cho khrihfabu member zat ceu lawng a si mi Chin miphun hi 

aa then tlak kan si lo.  Kan i dawt i kan i hlum lawng ah kan tthawng lai.  

Hi tluk a tetuai mi miphun kan si hi i hngal hna usih.  

I hlum le komh lawng kan herh.

Lam sul a that lo i kan i hmuh khawh hna lo ruang ah Lairam hi ram lian tuk ah 

ruat sual hlah usih.  Milu thong kul sawm thum hrawng in i tthen lulh in 

kan um ahcun kan tthang lai lo, kan fim kho lai lo, kan pumrua zong 

a lian kho lai lo.  Chan tha chung i kan luh hmanh ah miphun tetuai te 

kan si peng lai.  Miphun lian deuh kan hmuh hna tikah kan thin a phang lai.  

Kan lu a zum peng lai.  Ram hruaitu hna zong nih 

mi tam deuh aiawhtu si hi duh i zuam hna u.

Kan Lairam hi ser than kan zuam piak hram u.

Bawpa nih thluachuah in pe hna seh!

[tang] Hakha khua a rawk tikah ngaih a chiami Mizoram Lawngtlai khua 

miphun hawi hna nih kut an samh.  Kan khuapi a rawk an ti.

Lairam Jesus Christ Baptist Church nih bawmhnak an tuah.

Thla an kan campiak hna.

[tang] Australia lei Chin unau hna an tho, Lairam harnak tuarmi hna caah.

[tang] Pu Lalthanhawla Sailo, Chief Minister of Mizoram, kan sin ah 
a tthumi zong a tho.  Chin unau hna caah a cawl ve.  

Mizoram in kan unau hna nih thlacamnak he 

harnak tuarmi caah ttan an la ve hna.  

[tang] Pu Lalthanhawla he a tthu ttimi Bawm, Bangladesh in Evengelical Christian
Church hruaitu hna zong thawng kan thanh hna bantuk in
an miphun hawi hna caah an tho ve. 

[tang] Denmark Chin Upa 

ICBM riantuannak thok hlan in mission riantuan duhnak a ngei mi an si.

Kan thok cangka in an kan telpi colh.  Laica le Laiholh thiam a herhnak kong ah

duhfak ngai mi an si.  Zohchunh tlak hruaitu upa an si.

[tang] CBCUSA Khawmpi, Indianapolis, Indiana

June 5-7, 2015

Kan miphun biaknak upa tampi kan i tong hna.  Pathian kan thangthat tti hna.

Leikhuaza Laitlai Chin hna nih kan ca le holh hna hi 

kan hman tti khawhnak ding kong kan ruat tti hna.

Kan Bible, Bible Hrilhfiah le Hla Cauk hna hman tti ding saduh kan that.

Kan ca le holh kan thiam ter hna lo ahcun ram dang ah kan fa le rual

an tlau ding hi kan phang tuk cio.  Nihin thluachuah kan timi hi

miphun tlau sualnak zong a si kho tiin kan phang dih.

Kan vawlei hi khua te pakhat bantuk a si caah kan i pehtlaihnak le rianttuan

tti ding in kan i sawm hna.  A bik in, semnak Lairam ah rianttuan hi duh cio a si.

Khrih Thawngtha a hngal rih lo mi an tam tuk caah Thawngtha chim cu

biapi tuk in kan chiah hna.

[tang] CBCUSA Khawmpi Dongtu ZCC chungtel 

[tang] CBCUSA Nubu minung 200 nih CBCUSA kong cu Pathian sin ah hla in 
lawmhnak an chim.  Hi nu upa vialte hi nihin ah kan tonmi harnak 
caah bawmhnak an kawl cuahmah hna.

2015 June zarh khatnak ah CBCUSA khawmpi cu kan tuah i leikhuaza 
Chin upa hna he Pathian kan thangthat tti hna.  CBCUSA ram chung 
zumtu 4000 cuang nih Bawipa Pathian cu hla in kan thangthat.  
Lairam khawmpi a ngaimi kan tam caah kan di a riam ngai hna.

Kan i lawmhnak a ziamh hlan ah July 2015 a dih lai ah semnak Lairam le 
Hakha khua curuah sur le ti lian le mincimhnak nih fak tuk in a rawk 
thawng kan theih.  Kan ngaih a chia, kan lung re a thei tuk cio hna.  
Pathian khuakhannak a si hnga maw thei hlah.  
Thlarau lei in thazaang kan lak tti chawng te ah Lairam ah harnak 
kan ton tikah thazaang chuah tti in kan um kho deuh.  
Kan khawmpi cu harnak a tong ding mi kan miphun hawi hna 
bawm kho ding in thazaang lak ttinak ko a lo.  

Pathian cu zei zong hngal tu a si caah a si kho ve tak ko.  
Zumhnak in kan ruah thiam ahcun thazaang la tti in 

kan Lairam le khua hna hi ser than nak caah a si kho ve.

Pathian nih riantuan tti hi a kan fial mi a si hrimhrim.
Amah le kan miphun caah.

******************************************