LAITLAI CHIN KONG 

Burma le India cu British cozah nih ram khat in a rak uk. 1937 ah ram hnih ah an tthen. Cu ruang ah Lairam cu tthen thum ah aa tthen. Cheu khat cu India ram chung ah, cheu khat cu Bangladesh ram chung ah an um. Cheu khat cu Burma ram chung ah kan um. 

Mizoram, India chung ah Lawngtlai khua cu Lai Autonomous District khuapi a si. A tu kan sawmmi hna hi Laitlai Chin an si ve. Laimi sinak an dir pi caah Baptist Church of Mizoram in an chuak i khrihfabu 94 cu a dang tein Lairam Jesus Christ Baptist Church tiin an um. Mizoram ah Lai [Pawi] cu an tam ngai. I fonh kho dih hna sehlaw an tthawng ngaingai lai. Nain, anmah le anmah an i hngal thlu kho rih lo.

Mizoram chung ah Saiha Autonomous District cu Mara an tam bik. Lai holh thiam an tampi ve. Mara cu mi dang an si hlei lo. Kan phun hawi khat lawng te an si. Nan phun hawi, Thianhlun, Hlawnching, Zathang, Hlawnceu, Cinzah le phun hawi dang lawng te an si ve ko. Mizoram State Government Speaker Pu Hiphei cu Mara Cinzah a si. Holh aa dang nain, thinsen aa khat mi kan si. Laitlai Chin an si ve.

Mizo hi Chin an si ve. Lai holh le Mizo holh hi 60% aa khat. Kan takpum chung kan lu in ke tiang min cu 90% aa khat. Miphun khat si lo ahcun holh i khah awk kan si lo. Chungkhar khat in kan chuah caah a si. Chin kan si hi hngalh dih ahcun kan i daw deuh lai. 

Bangladesh ram lei in Bawm Laimi cu Lai holh an hmang ve ko. Nain, an biafang le aw-cawi aa dang deuh. Kan bia hram aa khat. Laitlai Chin an si.

Burma ram chung ah a ummi kong cu theih cia a si. Zotung le Mara he kan hman ttimi kan pupa hlawn thil cawngnak, puansen le phirban hni (hni tial) le kawr (angki) hna cu aa khat. Thisen le hman mi hlawn thil aa khatmi kan si. Kan umnak aa dan hmanh ah kan chuahkehnak aa khat. Thisen cu holh nih a thleng kho hlei lo. 

Nihin Laitlai Chin hna

Nihin ah vawlei ram kip ah Laitlai Chin kan phan hna. Pathian nih kan miphun a kan hruaining hi khuaruahhar a si kan ti tawn. A si ko. Kan umnak cio in kan ca le holh le nunphung kan dirpi cio hna. Kan tlau sual lai ti kan phan caah a si.

Kan miphun ca le holh le nunphung hi buu pakhat le area pakhat lawng nih dirpi khawh ding a si lo. Pathian nih thisen khat in a kan sermi leikhuaza Laitlai Chin dihlak nih dirpi kan hau. Kan miphun hruaitu cu Pathian a si.

Pathian cu Laitlai Chin hna thluachuah petu Bawi a si. Pakhatnak ah kan chiah. Kan ca le holh le nunphung cu Amah Pathian nih A kan pekmi a si caah kan kilven khawh nak ding ah Laitlai Chin hna tonnak ngeih lengmang kan hau. Cu caah, civui hna zong hi kan i sawmnak a si.

Tu chan kan fanau le nih theih nan herh ngai in ka ruah caah ka FB hawi le nan rel cio ding ah ka tial cia mi ka nolh than. Ka palhnak a um ahcun ka ngaithiam u. Civui ah kan i hmu hna lai. 

C Duh Kam
Indianapolis, Indiana